СДСМ по итна постапка поднесе предлог-закон за намалување на данокот на додадена вредност за горивата од 18 на 5 проценти, со цел ублажување на инфлаторните притисоци и заштита на животниот стандард на граѓаните.
Пратеничката Сања Лукаревска изјави дека измените се однесуваат на сите видови моторни бензини и дизел горива, со што, како што посочи, директно ќе се влијае врз цените и потрошувачката кошничка.
„Со намалувањето на ДДВ-то се намалува ефектот врз вкупното ниво на цените, имајќи предвид дека горивата влијаат врз транспортот, храната и сите останати производи“, рече Лукаревска.
Таа предупреди дека растот на цените станува сè поизразен и дека економската криза, според најавите од Европската унија, ќе трае подолг период, поради што се потребни навремени и посуштински мерки.
Според податоците на Државниот завод за статистика, трошоците за живот во март 2026 година се повисоки за 4,9 проценти на годишно ниво, додека најголем ценовен притисок има кај храната и безалкохолните пијалаци, каде растот достигнува 7,5 проценти.
Лукаревска нагласи дека поскапувањето на горивата има директен ефект врз секојдневниот живот на граѓаните – од цената на храната до транспортот, што, како што рече, ја намалува куповната моќ.
„Не станува збор за луксуз, туку за поскапување на нормалниот живот“, истакна таа, додавајќи дека предложеното намалување на ДДВ-то претставува „посилен одговор“ на ценовниот удар врз граѓаните.
Со предлог-законот, СДСМ бара подлабока интервенција во фискалната политика, откако претходно стапката за горивата веќе беше намалена од 18 на 10 проценти како привремена мерка.
