Рускиот министер за надворешни работи Сергеј Лавров денеска присуствуваше на Форумот на министрите за надворешни работи на АСЕАН во Манила, каде што се сретна и со американскиот државен секретар Марко Рубио.
По средбата, Лавров накратко застана пред новинарите, но одби да одговори на прашањата поврзани со војната во Украина, можниот прекин на огнот и наводите дека Русија му помага на Иран во нападите врз американски цели.
Наместо одговор, тој погледна кон еден од новинарите и рече: „Убава фризура“, по што си замина.
Во последните денови во медиумите се појавија наводи дека американските разузнавачки служби проверуваат дали Русија му обезбедувала на Иран разузнавачки информации и технологии за насочување на беспилотни летала, користени во напади врз американски објекти на Блискиот Исток.
Според „Ројтерс“, истрагата сè уште е во тек и американските разузнавачки служби не донеле конечен заклучок за евентуалната вмешаност на Москва.
По средбата со Лавров, ниту американскиот државен секретар Марко Рубио не сакаше да коментира дали ова прашање било тема на разговор.
На прашањето од новинар дали разговарал со Лавров за можната руска помош за Иран, Рубио одговори: „Кој вели дека тоа се случува? Медиумите известуваат? Тогаш сигурно е вистина. Да претпоставиме дека е така, секако не би разговарал за тоа во медиумите.“
