Пентагон прави анализа на американското воено присуство на Блискиот Исток, а една од главните теми е дали САД треба да ги намалат или преместат силите од базите во Персискиот Залив, кои во текот на војната со Иран беа изложени на напади.
Според осум извори запознаени со процесот, анализата ја предводи Канцеларијата за политика на Пентагон, а во неа учествуваат и Здружениот штаб и Централната команда на САД (CENTCOM). Иако засега нема формална наредба за целосна ревизија, во Министерството за одбрана се разгледува дали дел од оштетените бази воопшто треба да бидат обновени во досегашниот облик.
Американските сили на Блискиот Исток вообичаено бројат околу 40.000 војници распоредени на речиси 20 локации, од Јордан до Оман. Најважните постојани бази се наоѓаат во Персискиот Залив, меѓу кои и базата во Бахреин, каде што е седиштето на Петтата флота на САД.
Во текот на конфликтот, американската војска претрпела значителни загуби и оштетувања на инфраструктурата. Пред почетокот на војната, CENTCOM евакуирал дел од базите по проценката дека се премногу изложени на ирански ракети и беспилотни летала.
Американската војска истовремено потрошила повеќе од 1.000 напредни пресретнувачи, со што биле намалени залихите на ракетите „Патриот“ и THAAD. Според податоците наведени во анализата, повеќе од 200 американски објекти биле оштетени или уништени во текот на конфликтот.
Евентуалното намалување на американското воено присуство би имало последици и за сојузниците во Заливот, кои со децении се потпираат на американската воена заштита. Дел од американските претставници сметаат дека безбедносната соработка може да продолжи преку продажба на оружје и размена на разузнавачки информации, дури и ако бројот на американски војници биде намален.
Во Вашингтон, сепак, постојат различни ставови за идниот распоред. Едни се залагаат за намалување на безбедносните обврски и поголем фокус врз американската територија и Кина, додека други предлагаат американските сили да се преместат на побезбедни локации или да се зајакне нивното присуство во Израел.
Засега, конечна одлука нема. Изворите нагласуваат дека евентуалните трајни промени во американското воено присуство би барале одобрение од највисокото политичко ниво.
