Дали се отвора нов фронт? Иран се закани по украинскиот напад во Каспиското Море

Нападот со беспилотни летала врз ирански товарен брод во Каспиското Море дополнително ги зголеми тензиите меѓу Техеран и Киев и отвори прашања дали конфликтот меѓу Русија и Украина би можел да добие нова димензија.

Украина тврди дека бродот превезувал воена опрема за Русија, додека иранските медиуми, повикувајќи се на официјални извори, објавија дека пловилото „Ана“ било погодено додека било закотвено во близина на влезот во реката Волга. Во нападот загинал еден морнар.

— реклама —

Техеран го оцени нападот како чин на агресија и го повика украинскиот вршител на должноста амбасадор на разговор. Иранскиот министер за надворешни работи Абас Арагчи порача дека нападот „не може да остане без одговор“.

Од друга страна, украинскиот претседател Володимир Зеленски соопшти дека украинските сили успешно погодиле руски воени и логистички пловила, за кои Киев тврди дека превезувале воен товар.

— реклама —

Украина со години го обвинува Иран дека ја поддржува Русија со испорака на беспилотни летала од типот „Шахед“, кои Москва ги користи во нападите врз украинска територија. Иако Техеран признава дека претходно извезувал дронови во Русија, негира дека тие биле наменети за војната во Украина.

— реклама —

И покрај острите изјави од Техеран, повеќе аналитичари оценуваат дека директен ирански воен напад врз Украина е малку веројатен. Според нив, Иран најверојатно ќе се задржи на дипломатски чекори, вклучително и покренување на прашањето во Советот за безбедност на Обединетите нации.

Во меѓувреме, украинскиот министер за надворешни работи Андриј Сибиха изјави дека Киев не сака непотребна ескалација со Иран, но повтори дека Техеран е директен сојузник на Русија во војната.

Воените експерти сметаат дека нападот во Каспиското Море не значи отворање нов фронт против Иран, туку обид на Украина да ги наруши логистичките линии преку кои Русија добива воена опрема.

Според нив, Украина најверојатно ќе продолжи со операции насочени кон транспортните правци во Каспиското Море, бидејќи располага со беспилотни летала со долг дострел, додека Иран ќе мора внимателно да процени како ќе одговори без дополнително проширување на конфликтот.