Иран се закани дека ќе ги нападне американските бази ако продолжи придружувањето на бродови

Иранската Исламска револуционерна гарда (ИРГЦ) се закани дека ќе ги нападне американските воени бази на Блискиот Исток доколку американската војска продолжи да ги придружува бродовите низ Ормускиот Теснец. Предупредувањето следува откако гардата соопшти дека нападнала четири танкери во Персискиот Залив, а уште три брода наводно налетале на морски мини, пренесува „Туркије“.

— реклама —

„Американската војска мора да знае дека ако продолжи ова, конфликтот ќе се прошири и на нејзините бази во регионот. Ова е сериозно предупредување“, соопшти иранската воена формација.

— реклама —

Според гардата, нејзините поморски сили следеле четири брода што се движеле по маршрута која Техеран ја смета за нелегална. Тие наводно биле нападнати истовремено додека префрлале нафта од еден танкер на друг во северниот и централниот дел на Заливот. Од гардата тврдат дека пожарите на бродовите сè уште не биле изгаснати.

Иранската формација соопшти и дека во текот на ноќта уште три брода налетале на мини западно од Ормускиот Теснец, по што се запалиле и биле запрени.

— реклама —

Во соопштението се наведува дека американските обиди да ги поттикнуваат бродовите да минуваат низ коридор за кој Иран тврди дека е нелегален и миниран придонесуваат за зачестени поморски инциденти.

Засега не е објавено кои бродови биле погодени, а тврдењата на Иранската револуционерна гарда не се независно потврдени.