Иран бара одговорност од САД и Израел: Меѓународното право не смее да биде подредено на силата

Иранскиот министер за надворешни работи, Абас Арагчи, предупреди дека неповикнувањето на одговорност на САД и Израел за нападите врз Иран би претставувало сериозен удар врз меѓународното право и безбедноста на сите држави.

Во авторски текст објавен од јапонската новинска агенција „Кјодо“, Арагчи наведе дека американско-израелските напади претставуваат јасно кршење на забраната за употреба на сила и повреда на суверенитетот на Иран.

— реклама —

Тој истакна дека американскиот воен напад не добил одобрение од Советот за безбедност на Обединетите нации, додавајќи дека тврдењата за можни идни закани сами по себе не претставуваат доволна правна основа за повикување на правото на самоодбрана.

— реклама —

Според Арагчи, последиците од ваквото кршење на меѓународното право ги надминуваат безбедносните интереси на Иран и рамнотежата на силите на Блискиот Исток. Тој предупреди дека, доколку силата го надвладее правото, ќе биде загрозен целиот меѓународен поредок, вклучително и авторитетот на Повелбата на ОН.

Иранскиот министер порача дека забраната за употреба на сила е обврзувачко правило кое подеднакво важи за сите држави, а не отстапка што големите сили им ја прават на помалите земји. Тој побара САД да ја запрат, како што ја нарече, агресијата врз Иран, да ги почитуваат неговиот суверенитет и територијален интегритет и да ја надоместат штетата од нападите.

— реклама —

Осврнувајќи се на нападите врз училишта, спортски стадиони, цивилна инфраструктура и нуклеарни постројки во Иран, кои се под надзор на Меѓународната агенција за атомска енергија, Арагчи истакна дека тие мора да се разгледуваат и во контекст на меѓународното хуманитарно право.

— реклама —

Тој потсети дека страните во вооружен конфликт се должни да ги разликуваат воените цели од цивилните објекти и населението, да избегнуваат несразмерни напади и да преземат мерки за ограничување на последиците врз цивилите.

Арагчи додаде дека Иран, согласно со членот 51 од Повелбата на ОН, го задржува правото на самоодбрана во случај на вооружен напад.