Експлозии и сирени во Бахреин, Иран тврди дека нападнал американска воена база

Нови напади со беспилотни летала го вознемирија Бахреин, откако противвоздушната одбрана на земјата пресретнала и уништила неколку ирански дронови. Истовремено, Иран соопшти дека извршил напад врз американска воена база во оваа заливска држава, во период на неизвесност околу можниот договор за завршување на војната меѓу САД, Израел и Иран, пренесува Ројтерс.

Станува збор за првите пресретнувања на ирански напади од страна на бахреинската противвоздушна одбрана од септември. Пред инцидентите се огласиле сирените, а властите издале две предупредувања за можни закани и ги повикале граѓаните да побараат засолниште.

— реклама —

Иранската револуционерна гарда соопшти дека нападнала американска воена база во Бахреин како одговор на, како што навела, „непријателските американски постапки“.

По два месеца затишје, жителите повторно биле вознемирени од експлозии. Првите детонации биле слушнати околу четири часот наутро по локално време, а нов бран експлозии следувал околу 6:30 часот.

— реклама —

Бахреинската војска соопшти дека нејзините системи пресретнале неколку воздушни напади пред проектилите или беспилотните летала да стигнат до целите. Притоа, Техеран го обвини дека продолжува со систематски непријателски активности кон земјата.

Според иранската државна телевизија „Прес ТВ“, Револуционерната гарда испратила шест дрона кон американскиот радар за противвоздушна одбрана во хеликоптерската база Ал-Рифаа во Бахреин. Американските и бахреинските власти засега не ги потврдиле овие тврдења.

Во Бахреин се наоѓа седиштето на Петтата флота на американската морнарица. Министерството за внатрешни работи ги повика жителите да останат смирени и да се упатат кон најблиското безбедно место.

— реклама —

Два дена претходно, Иранската револуционерна гарда исто така тврдеше дека нападнала американски радар за рано предупредување во Бахреин. Американската војска ги отфрли тие наводи, соопштувајќи дека пресретнала два ирански дрона и дека нема материјална штета.

Дипломатските напори за завршување на конфликтот, кој трае речиси девет месеци, засега не донеле значителен напредок. Иако интензитетот на борбите меѓу САД и Иран е намален, повремените напади продолжуваат.

— реклама —

Американскиот претседател Доналд Трамп изјави дека би можел да се откаже од нови напади врз Иран доколку нема дополнителни провокации од Техеран или јеменските Хути, кои добиваат поддршка од Иран. Сепак, тој потврди дека американската поморска блокада ќе остане во сила.

Во меѓувреме, продолжуваат и судирите на другите жаришта во регионот. Коалицијата предводена од Саудиска Арабија соопшти дека пресретнала две балистички ракети испукани од Хутите кон главниот град Ријад, како и три беспилотни летала над источниот дел на Саудиска Арабија, регион богат со нафта.