Иран сè уште располага со до 2.500 балистички ракети и покрај американските и израелските напади

Иран и по американските и израелските напади располага со околу 1.500 до 2.500 балистички ракети, покажува најновата процена на американските разузнавачки служби, објавена од „Волстрит џурнал“. Податоците се засноваат на информации од американски функционери запознаени со разузнавачките процени.

Сепак, степенот на сигурност на процената е низок, бидејќи не е утврдено колкав дел од ракетите е подготвен за лансирање, а колкав се наоѓа во складишта. Американските претставници сметаат дека Техеран и натаму има значителен капацитет да ги нападне американските сили и нивните сојузници доколку повторно избие војна.

— реклама —

Иако американските и израелските напади тешко ги оштетиле иранските производствени капацитети, Иран продолжил да го обновува арсеналот користејќи претходно произведени компоненти. Производството е побавно отколку пред војната, но земјата располага и со голем број беспилотни летала и ракети со краток дострел. И израелски воени претставници проценуваат дека Иран има повеќе од 1.500 балистички ракети.

Поранешната висока функционерка на Пентагон, Симон Лидин, предупредува дека дури и најниската процена би значела дека Техеран обновил повеќе од половина од арсеналот со кој располагал пред војната. Овие податоци ги доведуваат во прашање тврдењата на американскиот претседател Доналд Трамп и неговата администрација дека иранската војска е речиси целосно уништена.

— реклама —

Американскиот министер за одбрана Пит Хегсет во вторникот изјави дека иранската воена индустрија повеќе не постои и дека биле уништени повеќе од 80 проценти од нејзините нуклеарни индустриски капацитети. Тој оцени дека САД оствариле историска воена победа.

И покрај претрпените загуби, Иран продолжил да нанесува штета на американските воени бази, радарите и системите за рано предупредување на Блискиот Исток. Поради тоа, дел од американската воена опрема била преместена во Израел, кој американските и израелските претставници го сметаат за побезбедна локација.

— реклама —

Според анализата, Техеран ја подобрил тактиката преку комбинирање ракети и беспилотни летала, како и со попрецизен избор на цели, при што добил помош и од Русија. Во меѓувреме, сателитските снимки покажале дека Иран повторно отворил пристап до дел од подземните складишта чии влезови биле затрупани во нападите. Израелски претставници веруваат дека ракетите складирани длабоко под земја во најголем дел останале неоштетени.

Американскиот претседател засега се определил за продолжување на економскиот притисок врз Техеран преку блокада и санкции, наместо за нова голема воена операција. Потпретседателот Џеј Ди Венс се обидел да отвори дипломатски канал со иранското раководство, но Трамп потоа му наредил да ги прекине преговорите и да се посвети на внатрешнополитичките прашања.

— реклама —

Сојузниците на САД од Персискиот Залив се противат на продолжување на војната поради страв од иранска одмазда. Израелскиот премиер Бенјамин Нетанјаху, пак, се залага за нови напади. Директорот на Мосад, Роман Гофман, во петокот во Вашингтон разговарал со американски претставници за Иран.

Трамп за време на обраќањето по повод Денот на ветераните порача дека американските воени цели сè уште не се целосно исполнети. „Победивме. Сега прашањето е кога сакаме да завршиме. Мораме да оствариме целосна победа, а не победа од 93 проценти“, изјави тој. Во подоцнежен разговор со радиоводителот Хју Хјуит, Трамп рече дека ако иранскиот режим остане на власт до крајот на неговиот претседателски мандат, тоа би претставувало пораз за САД.