Бобан Милошески, сопственикот на „Авалон продукција“, остро ѝ одговори на новинарка која го праша зошто досега не е објавено колку ќе чини настапот на Дејвид Гета во рамките на прославата на 35-годишнината од независноста.
На денешната прес-конференција, посветена на безбедноста и организацијата на утрешниот концерт во Националната арена „Тодор Проески“, новинарката го праша Милошески дали постои клаузула која го спречува објавувањето на сумата од договорот.
„Дали ти изгледам јас како идиот? Јас кажав за што е пресот, имате да поставите прашање во контекст на пресот?“, одговори Милошески.
Тој потоа објасни дека за сумата за целокупната прослава треба да одговори Владата, бидејќи тој е организатор на концертот на Дејвид Гета.
„Ова прашање е неколку пати поставувано на другите прес-конференции, на претставниците на Владата коишто треба да одговорат на тоа прашање. Јас не сум тој што треба да одговори на ова прашање, јас сум организатор на концертот на Дејвид Гета“, рече Милошески.
Тој го оцени прашањето како непотребна провокација и посочи дека од Владата повеќепати било кажано кога ќе биде објавена финансиската конструкција за целокупната манифестација.
„Најкултурно и најљубезно ве замолив да пропагирате да помине ова што е можно подобро и сметам дека нема потреба за ваква провокација. Неколкупати ви е кажано кога ќе биде објавена сумата за целокупната манифестација“, изјави сопственикот на „Авалон“.
Во рамките на прославата на 35-годишнината од независноста во изминатите недели беа организирани повеќе настани, меѓу кои концертот на шпанскиот тенор Хозе Карерас со македонски музички ѕвезди, како и прикажувањето на мјузикл во 11 градови.
Од Владата досега не е објавено колку чини целокупната организација на прославата. Владината портпаролка Марија Митева претходно изјави дека финансиските детали ќе бидат објавени откако ќе завршат најавите за сите настани.
