Данската влада воведе нови мерки за спречување на препишувањето со помош на вештачката интелигенција во средните училишта. Отсега, средношколците ќе мора усно да ги бранат своите писмени работи, а училиштата ќе бидат охрабрени поголем дел од задачите да се изработуваат под надзор во училница.
Новите правила беа објавени една недела пред почетокот на новата учебна година и стапуваат во сила веднаш. Министерот за образование, Магнус Хојнике, порача дека е неопходна брза реакција поради сè почестата злоупотреба на алатките со вештачка интелигенција.
Покрај задолжителната усна одбрана на завршните писмени работи, училиштата ќе треба да користат алатки за следење на активностите на компјутерите за време на писмените испити и да инсталираат заштитни системи што ќе го ограничуваат пристапот до недозволени содржини.
Третата мерка предвидува учениците што е можно повеќе задачи да ги пишуваат во училиште, под надзор на наставниците, со цел полесно да се следи нивниот напредок и да се обезбеди поправедно оценување.
Во исто време, данската влада подготвува национална стратегија за користење на вештачката интелигенција во образованието. Целта, според Министерството за образование, е AI да биде корисна алатка, но да не ги поткопува знаењето, вештините и способноста на учениците самостојно да размислуваат.
Слични предизвици има и во други земји. Во соседна Шведска, бројот на ученици санкционирани поради недозволена употреба на вештачка интелигенција пораснал за 688 проценти во периодот од 2023 до 2025 година, по што и шведските власти започнаа анализа за можни дополнителни мерки.
