ЧАТГПТ

OpenAI повторно на суд: ChatGPT обвинет дека не спречил самоубиство на девојка

OpenAI повторно се најде на суд поради сериозни обвинувања поврзани со безбедноста на платформата ChatGPT, откако против компанијата беше поднесена нова тужба во име на Кристи Кериер, чија ќерка Алис извршила самоубиство на 2 јули 2025 година.Во тужбата се наведува дека Алис во месеците пред смртта разговарала со ChatGPT за своите суицидални мисли и планови, но дека компанијата не воспоставила соодветни заштитни механизми за да го прекине разговорот или да го извести нејзиното семејство за ризикот.Покрај обвинувањата за небрежност и смрт предизвикана од небрежност, тужбата бара судска забрана со која OpenAI ќе биде обврзана да воведе посилни заштитни мерки во своите системи за вештачка интелигенција.„Како што се тврди во тужбата, намерните одлуки при дизајнирањето на OpenAI доведоа до оваа трагична смрт од самоубиство. Наместо да обезбеди помош, OpenAI го охрабри суицидалното однесување. Оваа тужба е за одговорноста на OpenAI за своите постапки“, изјави Џастин Нелсон, партнер во адвокатската фирма „Сусман Годфри“, која е една од страните во постапката.Ова не е првпат OpenAI да се соочи со вакви обвинувања. Компанијата минатата година беше опфатена со првата тужба за смрт поврзана со четботот, а подоцна беа поднесени и други тужби во кои се тврди дека ChatGPT поттикнал заблуди кај корисник пред неговото самоубиство, како и случај во кој совет добиен од четботот наводно довел до смрт од случајно предозирање.Во меѓувреме, и други компании што развиваат четботови, меѓу кои Character AI и Gemini, се соочија со правни постапки поврзани со безбедноста на нивните алатки.OpenAI минатата година воведе родителски контроли за ChatGPT, а во мај годинава додаде функција што му овозможува на четботот да контактира со друго лице во име на корисникот доколку тој сподели суицидални мисли. Сепак, оваа опција не е автоматски активирана, туку се вклучува по избор и е достапна само за полнолетни корисници.

Свет | пред 10 часа

„ChatGPT“ сега може да креира и уредува презентации во „PowerPoint“

OpenAI ја претстави интеграцијата на ChatGPT со Microsoft PowerPoint, овозможувајќи им на корисниците директно во апликацијата да креираат и уредуваат презентации со помош на вештачка интелигенција.Новата функција му овозможува на „ЧетГПТ“ да создава целосно нови слајдови, но и да уредува, дополнува и освежува постојни презентации. Сè функционира преку едноставни текстуални команди на природен јазик.Дополнително, системот може да повлекува податоци и материјали од поврзани сервиси како Gmail, Outlook и SharePoint, што треба да го олесни креирањето деловни презентации врз основа на постојни документи и комуникации.Опцијата засега е во бета-фаза, но веќе е достапна за поголем дел од корисниците.Овој потег се смета за одговор на конкуренцијата во областа на вештачката интелигенција. Anthropic веќе воведе слична функција во својот четбот Claude, додека Google одамна го интегрираше моделот Gemini со платформата Google Slides.Досега „ПауерПоинт“ беше еден од ретките канцелариски алати без подлабока интеграција со „ЧетГПТ“, кој веќе работи во апликации како Microsoft Excel и Google Sheets.

Магазин | пред 3 седмици

Њујорк сака да им забрани на AI-четботи да даваат правни и медицински совети

Законодавното тело на американската сојузна држава Њујорк разгледува предлог-закон со кој на четботи базирани на вештачка интелигенција би им се забранило да даваат правни и медицински совети.Предлогот предвидува и можност корисниците да ги тужат сопствениците на четботи доколку ја прекршат оваа одредба, објави порталот Statescoop.Станува збор за сенатскиот предлог-закон S7263, кој беше претставен на последната седница и минатата среда едногласно помина во Комитетот за интернет и технологија со шест гласа „за“. Тој е дел од поширок пакет мерки за регулирање на четботите со вештачка интелигенција.Законот се однесува на AI-четботи кои се претставуваат како лиценцирани професионалци, како лекари или адвокати, и им забранува да даваат „суштински одговор, информација или совет“ што би можел да претставува кршење на законите за професионално лиценцирање или неовластено вршење професија.Исто така, сопствениците на четботи ќе мора јасно и видливо да ги известат корисниците дека комуницираат со систем на вештачка интелигенција. Известувањето мора да биде на ист јазик како четботот и со читлива големина на буквите. Сепак, во предлогот се нагласува дека ваквата напомена не ги ослободува компаниите од одговорност.Благодарение на предвиденото право на приватна тужба, корисниците би можеле да покренуваат граѓански постапки против сопствениците на четботи и да бараат надомест на штета и адвокатски трошоци.Експертите сметаат дека токму ова право е клучно за спроведување на законот, бидејќи регулативите за податоци или системи со вештачка интелигенција без ваков механизам често се покажуваат послаби.Главниот државен обвинител на сојузната држава Мејн, Арон Фреј, неодамна оцени дека ваквиот механизам има „значаен одвраќачки ефект“.Доколку законот биде усвоен, тој ќе стапи во сила 90 дена по потпишувањето од гувернерот. Во истиот законодавен пакет се и мерки за заштита на малолетниците од небезбедни функции во четботите, како и правила за одредени интернет-платформи, меѓу кои и гејминг платформата Roblox, за која се смета дека има слаба заштита на приватноста на младите корисници.Дополнителни предлози предвидуваат задолжителни известувања на генеративните AI-системи, како и нови правила за ракување со биометриски податоци и создавање синтетичка содржина.Авторката на предлог-законот, државната сенаторка Кристен Гонзалез, која претседава со Комитетот за технологија, изјави дека пакетот мерки има цел да обезбеди развојот на вештачката интелигенција „да не оди на сметка на безбедноста на жителите на Њујорк, особено на децата“.Во јануари апликацијата за генеративни AI-четботи Character.AI и компанијата Google решија неколку тужби поврзани со улогата на нивните четботи во самоубиства на неколку малолетници.„Луѓето заслужуваат вистинска грижа од вистински луѓе. Заслужуваат транспарентност, одговорност и гаранција дека нивните податоци се безбедни додека ја користат технологијата“, изјави Гонзалез.

Свет | пред 3 месеци