Шведската влада ги забрани ChatGPT и Claude на владините компјутери

Шведската влада од денеска им забрани на вработените да ги користат ChatGPT и Claude преку интернет-прелистувачи на службените компјутери, поради ризиците за безбедноста на чувствителните податоци. Одлуката следува по проверка на употребата на алатките за вештачка интелигенција, спроведена претходно годинава од Шведската управа за транспорт.

— реклама —

Шведските власти предупредуваат дека внесувањето чувствителни информации во овие системи, без договор што гарантира заштита на податоците, може да доведе до нивно складирање и користење за понатамошно обучување на моделите на вештачка интелигенција.

„Користењето платформи што не се опфатени со договори може да има последици за нашата информациска безбедност“, изјави Микаел Ветеркранц, директор за дигитализација во владините служби. Оваа практика е позната како „сенковита информатичка технологија“ (shadow IT).

— реклама —

Како дозволена алтернатива се препорачува Microsoft Copilot, кој поминал безбедносна проверка и е опфатен со договор за безбедност на податоците меѓу американската компанија и шведската влада.

— реклама —

Државните службеници и понатаму ќе можат да користат вештачка интелигенција во работата, но под построг безбедносен надзор. Ограничен број вработени ќе имаат пристап до ChatGPT и Claude преку посебна платформа за асистенти со вештачка интелигенција, развиена од шведските власти.

Според шведскиот јавен радиодифузен сервис „Сверијес радио“, слични ограничувања вовеле и Даночната управа и Националниот одбор за институционална грижа, додека Агенцијата за извршување разгледува воведување исти мерки.

ChatGPT и Claude така се придружуваат на DeepSeek на списокот на алатки за вештачка интелигенција што шведската влада не ги одобрува од безбедносни причини. Во текстот се наведува и дека минатата недела САД објавиле забрана за сите производи и услуги на кинеската компанија DeepSeek.