Денеска е Петковден – празникот посветен на Света Петка, светицата на која народот ѝ се моли за здравје, мир и заштита

Православните верници денеска, 27 октомври, ја одбележуваат Света Петка Епиватска, позната и како Петковден или Црна Света Петка. Култот кон светицата е длабоко вкоренет и меѓу Македонците, а празникот се поврзува со бројни народни верувања и обичаи.

Според народните верувања, Света Петка ги штити луѓето од несреќи, суши, поплави и громови, а жените ѝ се молат за заштита и потомство. Празникот е посветен на Света Параскева Епиватска, која е најпозната од трите светици што го носат ова име.

— реклама —

Света Петка била родена во Епиват, кон крајот на X век, во христијанско семејство со словенско потекло. По смртта на родителите го напуштила домот, заминала во Цариград, а потоа и во јорданската пустина, каде што живеела во молитва, пост и духовно подвизување.

— реклама —

Според преданието, пред смртта ѝ се јавил ангел и ѝ рекол да се врати во родниот крај. Таму живеела уште две години, по што починала. Бидејќи жителите не ја познавале, била погребана надвор од градот. Подоцна, кога нејзиното тело било откопано, било забележано дека не се распаднало. Преданијата раскажуваат и за соништа во кои светицата барала нејзините мошти да бидат пренесени на друго место.

Моштите на Света Петка низ вековите биле пренесувани на повеќе места, меѓу кои Трново во Бугарија, Влашко, Белград и Цариград. Денес се наоѓаат во романскиот град Јаш, каде што верниците доаѓаат да им се поклонат.

— реклама —

Во Македонија празникот се одбележува со различни обичаи. Во многу места верниците носат леб, пченица и вино во црквите, а познат е и обичајот „петолебие“, при кој се носат пет лепчиња во спомен на библискиот настан кога Исус Христос нахранил пет илјади луѓе со пет леба.

По осветувањето, едно лепче се враќа кај верникот, а останатите четири остануваат во црквата. На празникот верниците палат свеќи и носат дарови, како масло за јадење и облека.

Според народната традиција, Петковден е ден за молитва и духовен мир, кога треба да се избегнува тешка физичка работа.