„Денес уште над 60.000 литри вода за Гостивар, водоводот итно да го прочисти системот, а сите надлежни да понесат одговорност“, вели Мицкоски

Премиерот Христијан Мицкоски изјави дека Владата ги завршила сите активности што биле во нејзина надлежност во врска со случајот со загадената вода во Гостивар и дека сега се очекува понатамошно постапување од Обвинителството.

— реклама —

Одговарајќи на новинарско прашање, Мицкоски рече дека утрово бил информиран од Институтот за јавно здравје дека сите наоди што се во нивна надлежност се завршени и доставени до Обвинителството, кое треба да ја даде правната квалификација на случајот.

Тој информираше дека Владата обезбедила 50.000 литри флаширана вода за пиење за жителите на Гостивар и најави дека испораките ќе продолжат секој ден. Според него, количините доставени вчера веќе се распределени, а во текот на денот се очекуваат уште три шлепери со повеќе од 20.000 литри вода секој.

— реклама —

Мицкоски нагласи дека, согласно препораките на Агенцијата за храна и ветеринарство и Институтот за јавно здравје, водата од водоводната мрежа во моментов не треба да се користи ниту за хигиена, ниту за други технички потреби.

— реклама —

Тој посочи дека Јавното комунално претпријатие во Гостивар треба да започне со прочистување и хлорирање на водоводниот систем, со цел во наредните неколку дена водата повторно да може да се користи барем за технички потреби.

Во однос на одговорноста, премиерот оцени дека треба да има морална одговорност кај сите надлежни во локалната самоуправа.

„Од градоначалникот па надолу сите треба да понесат одредена морална одговорност“, изјави Мицкоски, додавајќи дека Владата ќе продолжи да им помага на граѓаните на Гостивар со обезбедување вода за пиење додека трае кризата.