Учениците кои не успеаја да се запишат во средно образование во првиот уписен рок, денеска добиваат нова можност преку второто електронско пријавување за учебната 2026/2027 година.
Според податоците на Министерството за образование и наука, по завршувањето на првиот уписен рок во средните училишта низ државата останале слободни вкупно 11.882 места. Во првиот рок успешно се запишале 13.397 ученици, додека преку електронскиот систем аплицирале вкупно 15.075 деветтоодделенци.
И оваа година најголем интерес има за стручното образование, каде што се запишале 8.910 ученици, додека во гимназиското образование се запишани 4.278 ученици.
Во меѓувреме, во повеќе средни училишта конкурсот веќе е затворен поради целосно пополнување на слободните места. Станува збор за дел од најбараните гимназии во Скопје и во другите градови низ државата. Во некои училишта ќе се спроведе и квалификациско тестирање за кандидатите кои освоиле ист број бодови.
Електронското пријавување во вториот уписен рок се реализира денеска, 23 јуни, додека доставувањето на потребната документација во училиштата е предвидено за 24 јуни. Конечните ранг-листи ќе бидат објавени на 25 јуни, најдоцна до 12 часот.
Од Министерството за образование и наука апелираат учениците и нивните родители внимателно да ги следат известувањата на училиштата и да ги почитуваат утврдените рокови за успешно завршување на уписната постапка.
