Десетици летови откажани во Холандија поради силниот ветер, невремето предизвика и штети

Десетици летови се откажани на аеродромот Схипхол во Амстердам, Холандија, поради силниот ветер што го донесе бурата Боело. Во одредени делови од земјата сè уште е на сила жолт метеоролошки аларм, а надлежните предупредуваат на можни дополнителни нарушувања во сообраќајот.

— реклама —

Невремето го наруши распоредот на повеќе авиокомпании, меѓу кои „КЛМ“, „Луфтханза“ и „Изиџет“. Поради силните налети на ветерот, одредени аеродромски писти не се во функција, што се очекува да предизвика дополнителни доцнења и откажувања на летови, пренесува „NL Times“.

— реклама —

Портпарол на аеродромот ги предупреди патниците дека авиокомпаниите ги приспособуваат распоредите на временските услови и ги советуваше информациите за патувањата да ги проверуваат директно кај превозниците. Компанијата „КЛМ“ уште во петокот и саботата откажа десетици летови поради неповолните временски услови.

Бурата предизвика и материјална штета низ Холандија во текот на ноќта меѓу саботата и неделата. Во северниот дел на Амстердам, дрво паднало врз автомобил во движење, додека во близина на градот Лохем, во покраината Гелдерланд, паднато дрво ја блокирало железничката пруга и го прекинало железничкиот сообраќај.

— реклама —

Во покраината Фризија, надлежните служби апелираа до граѓаните да не го користат бројот за итни случаи 112 за пријавување паднати дрвја и гранки, освен ако постои непосредна опасност за луѓе или животни.

Надлежните предупредуваат дека силните налети на ветерот и понатаму може да предизвикаат проблеми во сообраќајот низ Холандија.