Авионскиот сообраќај на аеродромот во Катанија денеска повторно е воспоставен, откако претходно беше прекинат поради активноста на вулканот Етна.
Аеродромската компанија SAC соопшти дека од 14 часот повторно се отворени секторите C1 и B3, откако нивото на предупредување за вулканска активност беше намалено од „црвено“ на „портокалово“.
Летовите, и за пристигнувања и за заминувања, продолжија од 14 часот.
Од 6 до 12 август биле откажани повеќе од една третина од вкупно 1.974 планирани летови од Катанија, додека околу 630 летови биле пренасочени кон други аеродроми.
Етна, еден од најактивните вулкани во Европа, често предизвикува проблеми во авионскиот сообраќај во Катанија. При вулканска активност, пепелта може да ги прекрие пистите и околните површини, а доколку навлезе во моторите на авионите може да предизвика сериозни проблеми.
Активноста на Етна влијаела и врз авионскиот сообраќај на Малта, јужно од Сицилија, каде исто така биле откажани летови поради облакот од пепел.
