Десет алпинисти, меѓу кои и светски познатиот непалски алпинист Нирмал Пурџа, исчезнаа по лавина што ја зафати нивната експедиција на планината Броуд Пик во Пакистан. Во потрагата се вклучени воени хеликоптери, беспилотни летала и спасувачки екипи, кои се обидуваат да стигнат до местото на несреќата.
Спасувачите успеале да лоцираат сигнал од уредите за следење на четворица од алпинистите, но засега не е познато дали тие се живи. Според информациите, сигналите се неподвижни и до нивната локација, која се наоѓа на височина меѓу 6.000 и 7.000 метри, потребни се околу четири часа искачување со дополнителен кислород. За останатите шестмина засега нема информации.
Директорот на агенцијата „Севен Самит Трекс“, Чанг Дава Шерпа, изјави дека се претпоставува оти лавината ги повлекла алпинистите додека се наоѓале на околу 6.600 метри надморска височина, по што била изгубена секоја комуникација со нив.
Во експедицијата имало алпинисти од Непал, Пакистан, Оман, САД и Кина. Покрај Пурџа, исчезнати се уште деветмина членови на тимот.
Претседателот на Алпинистичката федерација на Пакистан, Ирфан Аршад Кан, соопшти дека спасувачите пронашле четири тела, но оваа информација сè уште не е официјално потврдена. Непалските власти, пак, ги водат своите шестмина државјани како исчезнати и соопштија дека досега немаат потврда за загинати.
Пакистанската армија испрати два хеликоптери со спасувачи и опрема, а во акцијата се вклучени и алпинисти од експедициите на К2 и К3, како и членови на неколку непалски компании. Потрагата се одвива во исклучително тешки услови, на голема надморска височина и во непредвидливо време.
Според претходни информации од непалските медиуми, уредот за следење на Нирмал Пурџа накратко покажал промена на локацијата, но не е познато што ја предизвикало.
Пурџа, познат и како Нимс Даи, стана светски познат во 2019 година кога за нешто повеќе од шест месеци ги искачи сите 14 планински врвови повисоки од 8.000 метри, соборувајќи го дотогашниот светски рекорд. Неговиот подвиг беше прикажан и во документарниот филм „14 Peaks: Nothing Is Impossible“.
Броуд Пик, висок повеќе од 8.000 метри, е дванаесеттиот највисок врв во светот и се смета за еден од најпредизвикувачките врвови во планинскиот масив Каракорум.
