Нов бран на тензии меѓу Пакистан и Авганистан следува по воздушните напади што пакистанските сили денеска ги извршија врз три куќи на авганистанска територија. Талибанската влада во Кабул соопшти дека во нападите загинале девет лица, меѓу кои жени и деца, додека пакистанските власти тврдат дека биле погодени засолништа на терористи и дека се убиени 22 лица што ги опишуваат како терористи.
Нападите биле извршени во авганистанските покраини Кунар и Хелманд. Портпаролот на талибанската влада, Забихула Муџахид, соопштил дека дополнително биле повредени 11 лица.
„Го осудуваме овој чин како агресија и злосторство што ги крши сите прифатени принципи“, изјавил Муџахид.
Пакистанското Министерство за информирање соопштило дека воздушните напади биле извршени врз основа на „уверливи разузнавачки податоци“ и дека биле погодени засолништа на терористи на две локации.
Од министерството тврдат дека целите биле „прецизно уништени“ и дека првичните информации покажуваат дека биле убиени 22 терористи. Според пакистанските власти, во нападите биле уништени и големи количества оружје и муниција складирани во засолништата.
Тврдењата на двете страни засега не можат независно да бидат потврдени.
Тензиите меѓу двете соседни земји повторно се зголемуваат по минатомесечниот напад на милитанти врз полициски објект во северозападен Пакистан, во кој загинале 24 лица.
Пакистан и Авганистан во февруари влегоа во еден од најтешките меѓусебни судири во последните години. Двете земји, кои некогаш биле сојузници, сè почесто се соочуваат поради дејствувањето на милитантни групи.
Исламабад го обвинува Кабул дека им обезбедува засолниште на милитантите кои извршуваат прекугранични напади. Талибанската влада ги отфрла обвинувањата и тврди дека милитантните групи се внатрешен проблем на Пакистан.
Во изминатите две недели Пакистан извршил неколку воздушни напади врз Авганистан, при што тврдеше дека биле погодени терористички кампови и убиени милитанти. Кабул, пак, тврди дека во нападите настрадале цивили.
Авганистанското Министерство за одбрана во неделата соопштило дека неговите сили убиле 28 милитанти, а раниле 32, откако група за која тврдат дека била составена од борци на Исламската држава влегла на авганистанска територија од Пакистан. Исламабад ги негира овие обвинувања.
