Најмалку 11 лица загинаа, а околу 30 се повредени во самоубиствен напад што денеска се случи во северозападниот дел на Пакистан.
Според полицијата и службите за спасување, напаѓачот активирал автомобил наполнет со експлозив на полициски контролен пункт во округот Дера Исмаил Кан, во покраината Хајбер Пахтунхва.
Информацијата за нападот ја потврдил портпаролот на покраинската служба за итна помош, Билал Фаизи.
Одговорноста за нападот ја презела групата Техрик-е-Талибан Пакистан (ТТП), позната и како пакистански Талибан.
Пакистан во последните години бележи зголемување на бројот на напади од вооружени групи. Според организацијата „Counter Extremism Project“, ТТП е сојуз на околу 40 племенски и неплеменски вооружени групи кои главно се борат против пакистанската држава.
Групата е основана кон крајот на 2007 година и е сојузник на авганистанските Талибанци. Според податоците на организацијата, припадници на ТТП редовно извршуваат напади врз безбедносните сили, цивили и политичари во Пакистан и Авганистан.
