Дејан Јованов-Деко е осомничен дека дал поткуп на службено лице во Министерството за економија за да добие лиценца за работа на „Пулс“, без воопшто да поднесе барање и иако знаел дека објектот не ги исполнува законските услови, соопшти Обвинителството откако „Скопје1“ објави дека против сопственикот на дискотеката е отворена нова истрага и се бара нов притвор.
Основното јавно обвинителство за гонење организиран криминал и корупција донело наредба за спроведување истражна постапка против едно лице за кривично дело „Давање поткуп“ од член 358 став 1 од Кривичниот законик.
Иако во соопштението осомничениот не е именуван, Обвинителството наведува дека против истото лице веќе се води постапка за „Тешки дела против општата сигурност“, додека претходно Кривичниот суд потврди дека попладнево добил нов предлог за мерки против Дејан Јованов.
Според Обвинителството, Јованов дал поткуп на службено лице во Министерството за економија за тоа да преземе службено дејствие кое не смеело да го изврши – да му обезбеди лиценца за вршење угостителска дејност.
Клучното тврдење на обвинителите е дека лиценцата била обезбедена иако за неа воопшто не било поднесено барање и во услови кога осомничениот знаел дека објектот не ги исполнува законските услови.
За „Давање поткуп“, делото за кое сега се води новата истрага, Обвинителството наведува дека е предвидена затворска казна од една до десет години.
Токму поради оваа нова истрага обвинителот од ОЈО ГОКК побарал од Основниот кривичен суд Скопје на Јованов да му биде определен нов притвор.
Обвинителството како причина ја наведува опасноста од бегство, но и фактот дека против него веќе се води друга кривична постапка за „Тешки дела против општата сигурност“.
Новиот предлог доаѓа непосредно пред истекувањето на законските рокови за притворот на Јованов во предметот за пожарот во „Пулс“.
Обвинителството и самото го посочува овој момент во образложението.
„Осомничениот до сега беше обезбеден како обвинет во друга постапка. Но, со оглед на тоа што во однос на тоа дело истекуваат законските рокови за обезбедување, а јавниот обвинител од ОЈОГОКК продолжува да прибира докази во однос на дејствијата на поткуп, тој процени дека ризиците за обезбедување на осомничениот се големи и побара да му биде определена притворска мерка“, соопшти Обвинителството.
Оттаму оценуваат дека притворот е „апсолутно неопходна мерка“ за обезбедување на присуството на осомничениот.
Обвинителството открива и дека службеното лице кое, според сомненијата, го примило поткупот веќе е обвинето и против него се води судска постапка за примање поткуп.
Сомневањата за поткуп при издавањето на лиценцата за „Пулс“ не се појавуваат првпат. Уште при отворањето на истрагата за пожарот, Обвинителството во март 2025 година соопшти дека постои основано сомнение дека првоосомничениот дал пари на службено лице од Министерството за економија за да добие лиценца без законски пропишаната постапка. Тогаш беше соопштено и дека против службеникот е поведена постапка за примање поткуп.
Она што сега е ново е посебната истрага на ОЈО ГОКК против Јованов за самото давање поткуп и барањето по тој предмет да му биде определен притвор.
Адвокатката на Јованов, Ивана Коцевска, претходно за „Скопје1“ изјави дека утре во 10 часот е повикана на рочиште пред судија на претходна постапка. Таа новиот предмет го оцени како обид нејзиниот клиент да остане во притвор откако ќе истечат роковите во предметот за пожарот.
„Претчувствував дека притисокот од јавноста ќе ги принуди органите да создадат ново дело и да дадат нов притвор, токму тоа и се случува“, рече Коцевска.
Станува збор за став на одбраната. Обвинителството, од друга страна, тврди дека продолжува да прибира докази за поткупот и дека постои опасност од бегство, поради што бара притвор.
За предлогот утре треба да одлучува судија на претходна постапка во Основниот кривичен суд Скопје.
