Вознемирувачко искуство од детско игралиште сподели мајка на социјалните мрежи, која вели дека нејзиното осумгодишно дете било удрено со фудбалска топка, а потоа било натерано да се тргне и да ослоби простор за други, а кога таа прашала кој го удрил и зошто следувале пцовки, навреди и закани од друго дете.
Според нејзиното сведоштво, топката била намерно упатена кон детето за да се тргне од просторот на игралиштето. Кога мајката отишла да праша што се случило, наместо извинување или разговор, добила вулгарни навреди и закани.
„Детето ми рече: ‘да ти пушам к…’, ‘ќе ти е… мајката’ и ‘ега да умреш’, а потоа рипна кон мене да ме нападне. Самата на себе си се чудам на самоконтролата“, наведува мајката.
Таа вели дека не го допрела детето, бидејќи е свесна дека станува збор за малолетник и дека како возрасна личност морала да остане присебна.
Случајот ја натера да се запраша каде се родителите и какви вредности им се пренесуваат на децата.
„Не го учам моето дете да се тепа, да навредува или да враќа со удар. Но не сакам да го учам ниту дека треба да трпи насилство само затоа што е воспитано“, порача таа.
Според неа, воспитувањето не треба да значи дека детето ќе биде жртва, туку дека ќе знае да препознае насилство, да се заштити и да побара помош.
„Не почнува сè со најстрашниот настан. Понекогаш почнува со едно туркање, една пцовка, една закана и со едно ‘не е ништо страшно, дете е’. Затоа родителите треба да разговараат со своите деца и да ги учат дека туѓото дете има исто право на почит како и нивното“, додава мајката.
