Општина Центар соопшти дека ги обнови детските игралишта кај „Зебра“ во Капиштец и кај КАМ маркет во Дебар Маало, каде што дотраените и оштетени реквизити се заменети со нови, со цел да се обезбедат побезбедни и поквалитетни услови за игра и рекреација на децата.
Градоначалникот Горан Герасимовски информираше дека по барање на жителите, од Министерството за внатрешни работи било побарано засилено присуство на полицијата на терен, особено во вечерните часови, кога најчесто се регистрираат случаи на вандализам и оштетување на детските игралишта.
„Во општината има околу 50 детски, спортски, маалски и училишни игралишта. Даваме сѐ од себе да ги одржуваме и унапредуваме, но за жал често се соочуваме со нивно оштетување, поради што повторно вложуваме средства за нивно санирање. Апелирам до граѓаните заеднички да водиме грижа за јавното добро и да ги чуваме содржините што се наменети за сите“, порача Герасимовски.
Тој упати апел до граѓаните да покажат поголема грижа за јавниот простор, истакнувајќи дека неговото зачувување е заедничка одговорност.
Герасимовски потсети и дека Општина Центар иницирала измени на повеќе закони со цел поефикасно справување со девијантното однесување кај младите, меѓу кои и воведување општокорисна работа за малолетните вандали и нивните родители.
За 2026 година, Општина Центар има предвидено 12 милиони денари за обнова и реконструкција на детските и спортските игралишта на својата територија.
