„Дипломатијата мора да води“: Пакистан нуди посредување во кризата меѓу САД и Иран

Пакистан ќе продолжи со дипломатските напори и обидите за посредување со цел да се стави крај на конфликтот меѓу САД и Иран, и покрај најновата ескалација на тензиите во регионот, соопшти пакистанското Министерство за надворешни работи.

— реклама —

„Пакистан е длабоко загрижен поради актуелната состојба во регионот, обележана со најновата ескалација. Апелираме до двете страни да се придржуваат кон претходно постигнатиот договор за прекин на огнот“, изјави портпаролот на Министерството, Тахир Андраби, на денешната прес-конференција.

— реклама —

Тој нагласи дека официјалниот Исламабад останува на ставот дека сите отворени конфликти треба да се решаваат по мирен пат, преку дијалог и преговори.

„Сметаме дека дипломатијата и дијалогот мора да бидат водечки принципи за постигнување договорено решение за сите спорни прашања, во согласност со правата и одговорностите на вклучените страни“, порача Андраби.

— реклама —

Изјавата на пакистанското Министерство за надворешни работи доаѓа во време на зголемена неизвесност на Блискиот Исток, откако последните американски и ирански напади ја доведоа во прашање одржливоста на претходно договореното примирје.

Пакистан и претходно повикуваше на воздржаност и дипломатско решавање на кризата, нудејќи поддршка за сите иницијативи насочени кон спречување на поширок регионален конфликт.