Соединетите Американски Држави ѝ ја поништија визата на бразилската амбасадорка во Вашингтон, Марија Луиза Рибеиро Виоти, само неколку дена откако Бразил одби да издаде визи за американски функционери, потврди претставник на американскиот Стејт департмент.
Според американската страна, одлуката не значи протерување на амбасадорката, туку претставува дипломатска мерка што може веднаш да биде повлечена доколку Бразил ја одобри акредитацијата на новиот американски амбасадор во Бразилија, Даниел Перез, номиниран од претседателот Доналд Трамп.
„Сметаме дека бразилската влада ни должи брз и позитивен одговор во врска со акредитацијата на нашиот амбасадор“, изјави претставникот на Стејт департментот.
Тој појасни дека амбасадорката и понатаму останува во САД, но без важечка виза, која ќе треба повторно да ја добие доколку се реши спорот околу дипломатските акредитации.
Одбивањето акредитација на амбасадор се смета за сериозен дипломатски чекор. Бразил кон крајот на јули одби да издаде визи за двајца американски претставници кои сакале да се сретнат со изборните власти пред претседателските избори во октомври, образложувајќи ја одлуката со ризик од политичка манипулација.
Во меѓувреме, администрацијата на Трамп веќе воведе дополнителни царини за бразилски производи, обвинувајќи го Бразил за нефер трговски практики.
Односите меѓу Вашингтон и владата на претседателот Луиз Инасио Лула да Силва се влошуваат во пресрет на претседателските избори во Бразил, каде што се очекува остра политичка пресметка меѓу левицата и десницата.
