Директорот на Бирото за јавна безбедност, Александар Јанев, соопшти дека бегалецот кој во петокот избега од Полициската станица во Кочани е пронајден и лишен од слобода во Скопје, нагласувајќи дека никој не може трајно да избега од правдата.
„Синоќа беше детектиран, лоциран и лишен од слобода бегалецот од Кочани. По интензивна потрага, лицето кое во петокот побегна од просториите на Полициската станица Кочани е пронајдено и приведено во Скопје“, изјави Јанев.
Тој истакна дека случајот е доказ дека секој што се обидува да ја избегне правдата, порано или подоцна ќе се соочи со законот.
„Никој не е недопирлив и никој не може трајно да избега од одговорност“, порача директорот на БЈБ.
Јанев нагласи дека пронаоѓањето на бегалецот не значи и крај на постапката, бидејќи внатрешната истрага за неговото бегство продолжува.
„Секој што со постапување или непостапување придонел за овој настан ќе сноси одговорност согласно закон и утврдените процедури. Должни сме да бидеме отчетни, транспарентни и да постапуваме со интегритет. Без разлика што лицето е повторно лишено од слобода, пропустите мора да бидат утврдени, а одговорност мора да има“, истакна тој.
Воедно, Јанев им се заблагодари на полициските службеници и раководството на СВР Скопје за, како што наведе, брзата, професионална и посветена акција, додавајќи дека полицијата останува цврсто посветена на борбата против криминалот и заштитата на безбедноста на граѓаните.
