Директорот на Службата за општи и заеднички работи, Ивица Томовски, остро реагираше на денешните обвинувања од СДСМ дека семејна фирма поврзана со него добила тендери во вредност од повеќе милиони евра. Тој ги нарече наводите „класична политичка клевета“ и побара извинување, најавувајќи тужба доколку тоа не се случи.
„Очигледна е намерата по секоја цена да се обвинува, клевети и жигосува. Тоа е нивниот стил и единствената сламка за спас,“ порача Томовски, додавајќи дека обвиненијата се обид да се одвлече вниманието од, како што рече, бројните скандали од времето на владеењето на СДСМ.
Тој предупреди дека токму оние кои, според него, оставиле длабоки последици врз институциите, денес пласираат „безобразни и малициозни конструкции“ за да го прикријат сопствениот неуспех.
„Посочената компанија не е моја. Немам никаков удел во неа, ниту пак во моментов поседувам приватна компанија. Моето единствено ангажирање е работата како директор на СОЗР,“ нагласи Томовски.
Тој додаде дека целата кариера ја градел чесно и професионално и најави дека ќе ги искористи сите правни механизми за заштита: „СДСМ ќе мора да се извини за клеветите. Во спротивно, ќе поднесам тужба.“
Во своето обраќање, Томовски порача дека јавноста веќе казнила „такви политики“, алудирајќи на исходот од последните избори, и додаде дека од СДСМ не очекува извинување, „бидејќи за тоа е потребна доблест и морал“.
Според него, сите институции може слободно да извршат проверки, уверувајќи дека нема што да се сокрие.
(Видео) Бомбите на СДСМ: Семејна фирма на директорот Томовски „чисти“ 5,5 милиони евра од буџетот
Членот на Централниот одбор на СДСМ, Александар Саша Димитријевиќ, денеска излезе со нови обвинувања против ВМРО-ДПМНЕ и актуелната влада, најавувајќи „нова бомба“ и „нов скандал“ поврзан со, како што вели, милионски злоупотреби на јавни средства.Според Димитријевиќ, Акцискиот тим (АКТ) на СДСМ продолжува да објавува докази за „криминалот на власта“ токму во пресрет на конгресот на ВМРО-ДПМНЕ. Тој тврди дека државни институции и општини под раководство на ВМРО-ДПМНЕ доделиле вкупно 161 тендер, во вредност од 5 милиони и 360 илјади евра, на фирма поврзана со Ивица Томовски – актуелен функционер во Владата, односно директор на СОЗР.Димитријевиќ тврди дека фирмата, основана со сопственик Витомир Томовски од Струга – татко на Ивица Томовски – прво била регистрирана под името „Сити логистик“, а подоцна го променила името во „Сити аутсорсинг“, задржувајќи иста адреса и единствен матичен број на субјект. Управител, според Димитријевиќ е нивни близок роднина, Слободан Кутановски.СДСМ тврди дека само во 2024 година, со доаѓањето на ВМРО-ДПМНЕ на власт, фирмата ја зголемила својата дејност за 306 проценти, а во текот на 2025 година веќе добила десет нови тендери со вредност близу половина милион евра.„Не чисти СОЗР, туку чисти семејната фирма на Томовски. Чистат пари – и тоа милионски суми,“ порача Димитријевиќ, додавајќи дека „важно е фамилијарните бизниси да течат“, додека јавноста останува без одговори.Тој најави дека ова е само почеток на новиот циклус објави од АКТ (тело на СДСМ), кои, како што кажа, ќе откријат „каде завршуваат парите и кој стои зад нив“.„Граѓаните се дел од еден тим, еден фронт. Сите сме против корупцијата,“ порача Димитријевиќ во завршницата.Власта засега нема официјален одговор на објавите.
Настани | пред 4 месеци
