„Дивоградбите во Охрид и низ Македонија треба да се уриваат по закон“, изјави Муцунски по одлуката на УНЕСКО за Охридскиот регион

Сите дивоградби, без разлика дали се наоѓаат во Охрид или во кој било друг дел од Македонија, треба да бидат отстранети во согласност со законските процедури, изјави министерот за надворешни работи Тимчо Муцунски, коментирајќи ја одлуката на Комитетот за светско наследство на УНЕСКО.

— реклама —

Тој нагласи дека секој случај мора да се разгледува поединечно, бидејќи надлежностите за постапување се поделени меѓу централната и локалната власт.

„Ако мене ме прашувате како министер и како член на Владата, а верувам дека тоа е ставот на сите членови на Владата, кога е во прашање дивоградба било каде, не само во Охрид, таа треба да биде отстранета. И тоа треба да биде направено на соодветен и законски начин“, рече Муцунски.

— реклама —

Изјавата доаѓа откако Комитетот за светско наследство на УНЕСКО одлучи Охридскиот регион засега да не биде ставен на Листата на светско наследство во опасност. Наместо тоа, Македонија и Албанија добија дополнителен рок за спроведување на препораките за заштита на регионот.

— реклама —

Муцунски оцени дека донесената одлука претставува значаен дипломатски успех за државата, но истакна дека тоа не значи и завршување на обврските. Според него, двете земји треба да изготват временски ограничена рамка за спроведување на Стратегискиот план до 2030 година, а до 1 февруари 2027 година да достават извештај за остварениот напредок.

Тој посочи дека препораките на УНЕСКО се однесуваат на повеќе области, меѓу кои урбанистичкото планирање, заштитата на животната средина и реализацијата на инфраструктурни проекти. Како што рече, за нивното исполнување е воспоставена координација меѓу надлежните институции.

Комитетот за светско наследство првично разгледуваше предлог Охридскиот регион да биде впишан на Листата на светско наследство во опасност, но по преземените обврски од Владата и општините одлучи да го одложи таквиот чекор и да даде дополнително време за исполнување на препораките.