Цените на горивата во земјите членки на Европската Унија во април годинава забележале значителен раст од 20,8 проценти во споредба со истиот месец лани, покажуваат најновите податоци на Евростат.
Станува збор за продолжување на трендот на поскапување, откако во март беше регистриран раст од 12,9 проценти на годишно ниво. До февруари годинава, цените на горивата и мазивата главно бележеа пад низ Унијата.
Експертите растот го поврзуваат со наглото зголемување на цената на суровата нафта по почетокот на конфликтот во Иран на 28 февруари. Дополнителен притисок врз пазарите предизвика и затворањето на Ормутскиот теснец, преку кој се транспортира околу една петтина од светската нафта, како и нападите врз енергетската инфраструктура на Блискиот Исток.
Според статистиката, цените на горивата пораснале во сите земји на ЕУ, а во 15 држави растот надминал 20 проценти. Најголемо поскапување е регистрирано во Луксембург со 33,8 проценти, пред Франција и Шведска.
Анализирано по видови гориво, дизелот во април бил поскап за 33,7 проценти во однос на април минатата година, додека бензинот поскапел за 13,6 проценти.
Во споредба со март, цената на дизелот се зголемила во сите земји од Унијата. Најголем месечен раст е забележан во Словенија со 23,5 проценти, Бугарија со 19,5 проценти и Кипар со 18 проценти.
Кај бензинот, поскапување е регистрирано во 23 земји членки, при што најголем раст има во Словенија со 12,9 проценти. Намалување на цените е забележано само во Романија, Шпанија и Полска.
