Дизелот во Хрватска поскапува на 1,80 евра, највисока цена годинава

Цената на литар дизел во Хрватска достигна 1,80 евра, што е највисоко ниво годинава и само незначително пониско од рекордните 1,85 евра од мај 2022 година.

Поскапе и бензинот, за седум центи, додека дизелот е поскап за девет центи.

— реклама —

Во стручната јавност се отвора и прашањето дали нарушувањата на меѓународниот пазар може да предизвикаат проблеми со снабдувањето, но хрватските нафтени експерти и ИНА уверуваат дека домашниот пазар има важна предност – Рафинеријата во Риека.

Нафтениот аналитичар и поранешен директор во ИНА, Давор Штерн, вели дека Риечката рафинерија може да го произведе целиот дизел што ѝ е потребен на Хрватска.

— реклама —

Според него, во кризна ситуација Владата би можела да размислува и за поинаков модел на формирање на цените, односно наместо целосно следење на берзанските цени, да се потпре на директното производство во домашната рафинерија.

„Имаме рафинерија во Риека која може да го произведе целиот дизел што ни е потребен“, вели Штерн.

Тој смета дека тоа би можело да биде особено важно за обезбедување дизел за домашниот пазар, вклучително и за земјоделството и рибарството.

— реклама —

Од ИНА, пак, претходно најавија зголемување на производството на дизел за околу 30 проценти.

Директорот за рафинерии и маркетинг во ИНА, Горан Плеше, изјави дека околу 80 проценти од хрватските потреби за дизел може да се задоволат од домашните производствени капацитети.

— реклама —

Тој дополнително посочи дека Рафинеријата во Риека работи со полн капацитет и дека засега не се планирани прекини во работата.