Лидерот на Сојузот на независни социјалдемократи (СНСД), Милорад Додик, оцени дека Европската Унија е подготвена војната во Украина да трае „до последниот Украинец“ и дека поради таквата политика конфликтот нема наскоро да заврши.
Во објава на социјалната мрежа Икс, Додик тврди дека ЕУ се обидува да ги оствари своите цели и интереси „преку животите и крвта на другите“.
„Војната се води на територијата на Украина, но во суштина тоа е борба на Европската Унија за слабеење на Русија. Сепак, се случи спротивното. Со инсистирањето на продолжување на војната, ЕУ ја уништува сопствената економија“, напиша Додик.
Тој се повика и на, како што наведе, изјава на германскиот канцелар Фридрих Мерц дека германската економија е во постојан пад бидејќи се потпирала на евтина руска енергија, која повеќе не ѝ е достапна.
Додик истакна дека Русија нема да биде поразена и оцени дека Европската Унија со децении ќе ги чувствува последиците од, како што ги нарече, „ирационалните одлуки“. Тој додаде и дека ЕУ има среќа што Русија ја предводи Владимир Путин, тврдејќи дека во спротивно последиците би биле уште потешки.
Додик со години одржува блиски политички односи со Русија и со рускиот претседател Владимир Путин. Тој повеќепати се сретнал со Путин во Москва, се противеше на санкциите кон Русија, како и на приближувањето на Босна и Херцеговина кон НАТО, а често изнесува ставови што се совпаѓаат со официјалната руска политика.
