Царинската управа поднесе кривична пријава до Основното јавно обвинителство Скопје против доктор и медицинска сестра, осомничени за обид за криумчарење на 199 вијали ботокс преку поштенска пратка лажно декларирана како козметички примероци.
Според информациите од Царинската управа, вредноста на пронајдениот ботокс изнесувала околу 615.000 денари, додека во приложената документација пратката била прикажана како 10 козметички примероци со вкупна вредност од 80 долари.
Случајот бил откриен од царински службеници на Царинската испостава Скопје 1 при детална контрола на поштенска пратка пријавена за увозно царинење. При отворањето на пакетот, наместо декларираните производи, биле пронајдени 199 вијали ботокс што се користат во естетската медицина.
По откривањето на случајот, Одделението за истраги на Царинската управа спровело предистражна постапка, а по налог на јавен обвинител биле извршени претреси на три локации.
Според утврденото во истрагата, првоосомничениот, вработен како доктор во Универзитетскиот клинички центар „Мајка Тереза“, ја нарачал пратката од компанија во Република Кореја и договорил производите во фактурата да бидат прикажани како козметички производи со значително пониска вредност.
Второосомничената, која работи како медицинска сестра во истиот клинички центар, според наводите на истрагата, се согласила пратката да пристигне на нејзино име и адреса, а фактурата ја платила од својата трансакциска сметка.
Против двајцата се поднесени кривични пријави за кривичните дела „криумчарење“ и „царинска измама“.
Од Царинската управа порачаа дека увозот на ботокс е строго регулиран и подлежи на посебни дозволи од надлежните институции, нагласувајќи дека секој обид за незаконски увоз на вакви производи ќе биде санкциониран согласно со законите.
