Инцидентот со беспилотно пловило пронајдено во Јонското Море предизвика дипломатска реакција од Атина, која официјално побара објаснување од Киев и предупреди на можните последици за безбедноста во регионот.
Како реакција на случајот, грчката влада испрати официјален дипломатски протест до Киев, оценувајќи дека беспилотното пловило претставувало сериозна закана за безбедноста на поморскиот сообраќај, но и за цивилното население и животната средина во регионот.
Според грчките медиуми, министерот за надворешни работи, Јоргос Герапетритис, ги информирал претставниците на Европската Унија и НАТО за резултатите од истрагата, а прашањето било отворено и во разговор со украинските власти.
Атина испратила писмени и усни протести до Киев на крајот од мај, нагласувајќи дека дронот, за кој се тврди дека можел да носи околу 100 килограми експлозив, претставувал потенцијална закана за цивилните бродови и животната средина.
Во протестната нота, грчката страна истакнала дека правото на Украина на самоодбрана не може да биде оправдување за активности што би можеле да ја загрозат безбедноста во Медитеранот и побарала вакви инциденти да не се повторуваат.
Според извештајот на грчкото Министерство за одбрана, анализираното пловило било беспилотен површински брод од типот „MAMAI“, модел кој претходно бил користен во напади врз руски поморски цели.
Техничката истрага покажала дека дронот бил опремен со два независни сателитски системи – еден за навигација и позиционирање, а друг за далечинско управување и видео-пренос во живо.
Грчките експерти утврдиле дека пловилото не било лансирано во близина на грчките острови, туку најверојатно влегло во грчките територијални води од област јужно од Италија. Според наодите, дефект во комуникацискиот систем довел до губење на контролата врз дронот, по што морските струи го однеле до брегот на Лефкада.
Во извештајот се наведува и дека по прекинот на комуникацијата бил активиран автоматски безбедносен протокол, поради што дронот се движел кон однапред зададени координати.
Грчките власти соопштија дека сега очекуваат официјален одговор од украинска страна во врска со целиот инцидент.
