Дрвошанов: Нови енергетски проекти, решение за професионалните војници и модернизација на здравството

Пратеникот на ВМРО-ДПМНЕ, Жан Дрвошанов, на денешната собраниска седница за пратенички прашања отвори три теми поврзани со енергетиката, одбраната и здравството, барајќи конкретни информации за придобивките од инфраструктурните проекти и владините мерки.

— реклама —

Во областа на енергетиката, Дрвошанов се осврна на повторното ставање во функција на продуктоводот Солун–Скопје по 13 години, како и на изградбата на гасоводните интерконектори со Грција и Србија. Тој побара појаснување како овие проекти ќе придонесат за енергетската сигурност, намалувањето на зависноста од еден правец на снабдување и создавањето услови за поконкурентни цени на природниот гас.

— реклама —

Второто прашање го упати до министерот за одбрана, барајќи детали за владината одлука за решавање на долгогодишниот проблем со професионалните војници кои навршуваат 45 години. Дрвошанов побара информации за предвидените мерки, роковите за спроведување и очекуваните придобивки за оваа категорија припадници на Армијата.

Во врска со здравството, пратеникот побара од министерот за здравство да ги презентира досегашните резултати од обновувањето на опремата и материјално-техничките капацитети, реализираните набавки и планираните инвестиции. Притоа, ја посочи промоцијата на 100 нови амбулантни возила како повод за прашањето за подобрување на условите за работа на здравствените служби.