Митко Трајчулески денеска од собраниската говорница оцени дека државата се наоѓа во „финансиска агонија“, а буџетот, како што рече, „се распаѓа“, обвинувајќи ја Владата за нови задолжувања и лошо економско управување.
Во обраќањето по повод предлог-законот за задолжување од 260 милиони евра кај комерцијални банки, Трајчулески ја критикуваше министерката за финансии што не присуствувала на седницата, оценувајќи дека токму таа требало да даде одговори за заемот пред пратениците и јавноста.
Пратеникот на СДСМ обвини и за „брутално кршење на процедурите“ во Собранието при носењето на законот, посочувајќи дека власта е подготвена на сè кога станува збор за пари и буџет.
Трајчулески рече дека уште при носењето на буџетите за 2025 и 2026 година предупредувале на, како што наведе, погрешно буџетско планирање и „вештачко напумпување“ на приходната страна.
Тој се повика и на мислење на Фискалниот совет, според кое оптимистичките проекции на приходите и зголемените тековни расходи доведуваат до надминување на буџетските дефицити и намалување на фискалната дисциплина.
Според Трајчулески, реализацијата на капиталните инвестиции во 2025 година била нешто над 50 проценти, а државата имала долг кон приватни компании од над 600 милиони евра за завршени, а ненаплатени работи, како и дополнителен долг од околу 150 милиони евра по основ на поврат на ДДВ.
Тој го спомена и кредитот од една милијарда евра преку унгарската кредитна линија, оценувајќи дека нема транспарентност за распределбата на средствата кон компаниите и општините.
Во говорот, Трајчулески ја обвини Владата и за нефункционалност на институциите и неефикасно управување, наведувајќи дека актуелното задолжување „не е крај, туку почеток на финансиска агонија за државата“.
