(Видео) Државниот врв е за набавка на нов авион оти овој се рарсипува, за опозицијата тоа е „расипништво“

Треба да се набави нов државен авион за официјални и државни потреби, порача директорот на Службата за општи и заеднички работи, Ивица Томовски, оценувајќи дека државата, доколку сака да се претставува сериозно на меѓународно ниво, мора да располага со соодветни транспортни капацитети.

— реклама —

Според Томовски, постојниот авион не ги задоволува потребите на државните институции. Тој посочи дека леталото е склоно на чести дефекти, повеќепати било испраќано на сервисирање, има ограничен капацитет од околу шест седишта и не овозможува превоз на соодветни делегации. Во таа насока, Томовски оцени дека сериозен државен имиџ подразбира и сериозни возила и авион.

View this post on Instagram

— реклама —

Изјавата веднаш предизвика реакции од опозициската СДСМ, од каде што ја обвинија Владата дека, во време на економски притисоци и ниски приходи, приоритет ѝ е луксузот, а не животниот стандард на граѓаните. Од партијата посочија дека додека работниците тешко ги покриваат основните трошоци за живот и додека минималната плата не се зголемува, Владата размислува за купување авион за премиерот и за, како што велат, туристички патувања.

— реклама —

Според СДСМ, за зголемување на минималната плата и за поддршка на приватниот сектор би биле потребни околу 200 милиони евра, додека за авион се споменуваат уште стотици милиони евра. Опозицијата оцени дека власта одбива да обезбеди повисоки плати, но не се откажува од луксузните трошоци.

Во реакцијата, од СДСМ направија и споредба со претходните влади, наведувајќи дека поранешниот премиер Никола Груевски купувал луксузни автомобили и скапи лични предмети со пари на граѓаните, а дека актуелниот премиер Христијан Мицкоски, според нив, сака да оди чекор понатаму преку набавка на авион вреден стотици милиони евра.

Полемиката околу државниот авион ја отвори пошироката дебата за владините приоритети, односно дали во услови на економски предизвици и барања за повисоки плати, државата треба да инвестира во скап авион или средствата да ги насочи кон подобрување на животниот стандард на граѓаните.