Држел 13 деца како заложници во градинка во Бразил, полицијата го убила по двочасовни преговори

Бразилската полиција убила маж кој вооружен со нож упаднал во предучилишна установа во градот Куритиба, на југот на земјата, и држел 13 деца како заложници. До интервенцијата дошло по повеќе од два часа обиди за преговори, соопштиле локалните власти.

Инцидентот се случил во петокот попладне во населбата Сао Браз, а мажот бил убиен околу 18:20 часот по локално време, соопштил Секретаријатот за јавна безбедност на бразилската сојузна држава Парана, пренесува бразилскиот портал G1.

— реклама —

Децата биле спасени, а според соопштението на воената полиција, ниту едно од нив не се здобило со потешки повреди.

Во соопштението се наведува дека мажот истурил запалива течност во просторијата во која се наоѓал со децата и имал намера да ја запали.

— реклама —

Областа околу установата била блокирана за време на интервенцијата, а припадниците на специјалниот полициски баталјон за операции (BOPE) се обидувале да преговараат со осомничениот.

Во акцијата учествувал и полициски хеликоптер.

— реклама —

Децата што се наоѓале во другите простории на установата успеале да излезат пред да заврши инцидентот, соопштила воената полиција.

Засега не е познато дали осомничениот бил во роднинска врска со некое од децата што ја посетувале установата.

Градските служби во Куритиба им пружиле помош на семејствата на децата, а биле ангажирани и психолози.

Родителите на учениците од блиското училиште биле повикани да ги преземат децата и да го евакуираат објектот.