Духовна радост и заедништво: Светогорскиот игумен Вартоломеј повторно во Бигорски

Братска средба исполнета со духовна радост и заедништво се одржа во Бигорскиот манастир, каде што гостуваа светогорски монаси и поклоници од Грција, предводени од архимандритот Вартоломеј, игумен на манастирот Есфигмен.

— реклама —

Гостите беа пречекани од бигорскиот игумен, епископот Антаниски г. Партениј, и монашкото братство. Средбата била исполнета со разговори за монашкиот живот, молитвата и значењето на единството во Христа.

— реклама —

Меѓу гостите биле и повеќе монаси од Света Гора, свештенослужители од Грција и Бугарија, како и архимандритот Никанор од манастирот на Светите Бесребреници во Перник. Во посетата учествувале и членови на Здружението на пријателите на манастирот Есфигмен, кои допатувале од Атина, Солун, Лариса и Агринио.

Епископот Партениј се потсетил на првата посета на игуменот Вартоломеј во мај 2022 година, кога тој бил првиот светогорски игумен што официјално го посетил Бигорскиот манастир по возобновувањето на литургиското заедничарење на Македонската православна црква со останатиот православен свет.

— реклама —

Светогорските гости изразиле благодарност за топлиот пречек и ја нагласиле важноста на меѓусебната љубов, молитвата и духовната поддршка. Од Бигорската обител посочуваат дека ваквите средби ги зацврстуваат духовните врски и го сведочат единството на Црквата.

— реклама —

На крајот, од манастирот упатија молитвени желби Пресвета Богородица и Свети Јован Крстител да ги закрилуваат гостите и монашкото братство, за сите да останат едно срце и една душа во љубовта Христова.