ДУИ: Еден од најнегативните извештаи на Европската комисија - политиките на Владата ја враќаат земјата назад

Демократската унија за интеграција (ДУИ) преку соопштение упати критики до Владата, оценувајќи дека Извештајот на Европската комисија за 2026 година е еден од најзагрижувачките во последните години и укажува на назадување во реформите, проблеми во институциите и забавување на европскиот пат на Македонија.

— реклама —

Од партијата особено ја издвојуваат оценката за спроведувањето на правата поврзани со употребата на албанскиот јазик и правичната и соодветна застапеност. Според ДУИ, овие прашања за првпат добиваат толку изразено место во извештајот на Европската комисија, што партијата го оценува како последица на политиките на Владата предводена од ВМРО-ДПМНЕ и ВЛЕН.

— реклама —

ДУИ наведува дека укинувањето на „Балансерот“, отсуството на нов механизам за застапеност и пречките со кои, според партијата, се соочуваат албанските граѓани и студенти при остварувањето на јазичните права, создале дополнителна загриженост.

Во соопштението се посочува и на отсуство на напредок во борбата против корупцијата, слободата на изразување, јавните набавки, заштитата на потрошувачите и здравството.

— реклама —

Од ДУИ прават споредба со Албанија и Црна Гора, кои, како што наведуваат, напредуваат во процесот на европска интеграција, додека Македонија сè уште не го отворила ниту првиот кластер во преговорите.

— реклама —

Партијата оценува дека извештајот треба да биде предупредување за промена на владиниот курс, нагласувајќи дека еднаквоста, функционалноста на институциите и европската перспектива не треба да бидат жртви на актуелните политики.