ДУИ со обвинувања: ВЛЕН ги пренасочува средствата за булеварот „Хасан Приштина“ и ја руши врската Скопје-Блаце

Демократската унија за интеграција (ДУИ) обвини дека ВЛЕН ги пренасочува средствата наменети за изградба на булеварот „Хасан Приштина“, познат и како Качанички пат, со што, според партијата, се доведува во прашање целосното инфраструктурно поврзување на Скопје со автопатот Скопје-Блаце.

Од ДУИ посочуваат дека на 6 април 2023 година тогашната Влада издвојила 8 милиони евра за изградба на булеварот „Хасан Приштина“, кој требало да го поврзе правецот кон Косово со скопската обиколница и автопатот Скопје-Блаце.

— реклама —

Според партијата, од средствата биле предвидени 2 милиони евра за изградба на кружен тек кај семафорите на булеварот „Словенечка“, додека дополнителни 6 милиони евра биле наменети за реализација на булеварот „Хасан Приштина“. Средствата биле префрлени на Град Скопје.

ДУИ тврди дека проектот бил дел од поширока инфраструктурна визија за поврзување на границата со Косово со Скопје и дека булеварот бил неопходен за целосно функционирање на автопатот Скопје-Блаце.

— реклама —

„Автопатот Скопје-Блаце нема целосно значење без модерен, функционален и достоинствен влез во Скопје од правецот на Косово“, велат од ДУИ.

Од партијата додаваат дека Град Скопје веќе го имал проектирано булеварот и дека биле водени разговори со стопанствениците од подрачјето на Визбегово.

ДУИ обвинува дека наместо средствата да се искористат за реализација на овој проект, актуелните власти ги пренасочуваат кон друг проект во центарот на Скопје.

— реклама —

Од партијата исто така ја обвинија ВЛЕН дека го одложила проектот за автопатот Скопје-Блаце за две и пол години и дека неговата вредност била зголемена за повеќе од 30 милиони евра.

„Не може да се зборува за автопатот Скопје-Блаце, а истовремено да се отстрануваат средствата за патот што треба директно да го поврзе со Скопје“, стои во реакцијата на ДУИ.

Од ДУИ оценуваат дека пренасочувањето на средствата покажува, како што велат, недостаток на визија и капацитет за реализација на стратешки инфраструктурни проекти.

ВЛЕН засега нема став по обвинувањата изнесени од ДУИ.