Два дрона забележани над германска воена база, полицијата отвори истрага

Новиот инцидент со беспилотни летала во Германија предизвика безбедносна тревога, откако два дрона биле забележани над воена база на Бундесверот во Мехерних, на западот на земјата.

— реклама —

Дроновите биле забележани во четвртокот околу 22 часот од службата задолжена за безбедносен надзор на базата. Нивното присуство било потврдено, по што на терен била испратена воена полиција.

— реклама —

Германската војска соопшти дека полицијата од Ојскирхен отворила истрага. Засега нема информации кој управувал со дроновите, ниту од каде биле лансирани.

Инцидентот се случува само два дена откако во близина на аеродромот Лајпциг/Хале бил пронајден дрон со експлозивна направа. Направата била деактивирана, а германскиот министер за внатрешни работи Александар Добрингт тогаш оцени дека случајот претставува „ново ниво на опасност“.

— реклама —

Аеродромот Лајпциг/Хале е едно од најзначајните европски карго-воздушни сообраќајни средишта и се користи и за логистичка поддршка на Украина. На аеродромот функционира и програмата SALIS на НАТО, која се користи за транспорт на опрема кон источното крило на Алијансата.

— реклама —

Германските власти во последните години се соочуваат со повеќе инциденти поврзани со сомнителни дронови и саботажи. Западните безбедносни служби претходно ја обвинуваа Русија и лица поврзани со неа за низа саботажи и други операции низ Европа, што Москва ги отфрла.