На Универзитетската клиника за инфективни болести и фебрилни состојби се лабораториски потврдени два случаи на Западнонилска треска во Македонија.
Двајцата пациенти се хоспитализирани, тие се под континуиран медицински надзор и се лекуваат согласно со современите медицински препораки, велат надлежните.
„Нивната здравствена состојба внимателно се следи“, информираат од клиниката.
Западнонилската треска е вирусно заболување кое се пренесува преку убод од инфициран комарец. Најголем дел од инфицираните лица немаат симптоми или имаат лесна клиничка слика, додека кај мал број пациенти, особено кај повозрасни лица и лица со ослабен имунитет, може да се развијат потешки невролошки компликации.
Од Клиниката упатија апел до граѓаните доследно да ги почитуваат мерките за лична заштита од убоди од комарци: користење креми за заштита, носење облека со долги ракави и ногавици при престој на отворено, поставување заштитни мрежи на прозорците и отстранување на застојаната вода во околината, каде што комарците се размножуваат.
Смируваат дека во моментов нема причина за паника, но има потреба од зголемена претпазливост, особено во летниот период, кога активноста на комарците е најголема. Граѓаните кои по убод од комарец ќе развијат висока температура, силна главоболка, вкочанетост на вратот, нарушена свест или други невролошки симптоми треба веднаш да побараат медицинска помош.
Клиниката останува во постојана координација со надлежните здравствени институции и внимателно ја следи епидемиолошката состојба. Според последните достапни европски извештаи, оваа сезона веќе се регистрирани случаи на Западнонилска треска во регионот, што ја нагласува важноста од навремена дијагностика, надзор и превентивни мерки.
