Двајца косовски државјани фатени на граница со накит вреден 1,1 милион денари скриен под облеката

Царински службеници на граничниот премин Богородица спречија обид за криумчарење на златен накит вреден околу 1,1 милион денари, откако при контрола открија двајца косовски државјани кои се обиделе нелегално да го внесат во земјава.

— реклама —

Според информациите од Царинската управа, станува збор за четири златни ланчиња со вкупна тежина од 190,6 грама, кои осомничените ги купиле во Турција. Со цел да го избегнат царинскиот надзор, накитот го ставиле на себе и го прикриле под облеката.

— реклама —

Случајот е предаден на Одделението за истраги при Царинската управа, кое против сторителите поднело кривична пријава до Основното јавно обвинителство во Гевгелија поради сомнение за кривично дело криумчарење.

Од Царинската управа информираат дека ова е 11. заплена на злато од почетокот на годината. Досега се одземени вкупно околу два килограми златен накит. Од вкупниот број случаи, четири се откриени на Богородица, пет на Меѓународниот аеродром Скопје, а по еден случај се евидентирани на граничните премини Табановце и Блаце.

— реклама —

Во девет од случаите, против десет лица се поднесени кривични пријави за криумчарење, казниво согласно Кривичниот законик.

— реклама —

Од Царинската управа порачуваат дека ќе продолжат со засилени контроли и бескомпромисна борба против сите форми на криумчарење и организиран криминал, со цел заштита на финансиските интереси на државата и обезбедување фер пазарна конкуренција.