Двајца мажи тешко повредени со остар предмет при обид да разделат тепачка во казино во Тетово

Двајца мажи на возраст од 48 и 50 години се здобиле со тешки телесни повреди од остар предмет при обид да разделат учесници во физичка пресметка во казино во Тетово.

— реклама —

Според информациите од МВР, инцидентот се случил ноќеска, а повредените биле донесени во Клиничката болница во Тетово во 1:45 часот. Поради сериозноста на повредите, 48-годишниот маж од Брвеница бил префрлен во комплексот клиники „Мајка Тереза“ во Скопје, додека 50-годишниот жител на Сараќино останал на лекување во Тетово.

— реклама —

Според пријавеното, двајцата се обиделе да разделат четворица мажи кои ја нарушиле јавниот ред и мир со меѓусебна тепачка.

— реклама —

Во врска со случајот, полицијата привела 34-годишен вработен во казиното поради сомнение за помагање во врска со кривичното дело „насилство“. Приведен е и еден од учесниците во пресметката, кој поради влошена здравствена состојба е под полициски надзор во болницата.

— реклама —

Останатите тројца учесници утрово сами се пријавиле во Полициската станица Тетово и биле задржани за понатамошна постапка. Од МВР информираат дека по целосното расчистување на случајот ќе следуваат соодветни пријави.