Меѓу тројцата македонски државјани кои загинаа во тешката сообраќајна несреќа во Словенија има две малолетни лица, потврди Министерството за надворешни работи и надворешна трговија.
До македонската Амбасада во Љубљана било доставено официјално известување од словенечката полиција за несреќата што се случила на 27 август на автопатот А1, во близина на Унец.
„Во незгодата животот го загубиле три лица – едно полнолетно и две малолетни лица, државјани на Република Северна Македонија“, информираат од МНР.
Во возилото имало уште две лица, исто така македонски државјани, кои се повредени.
Претходно словенечките медиуми, повикувајќи се на полициски информации, објавија дека во несреќата учествувале патнички автомобил и камион кој поради дефект бил запрен покрај автопатот. Автомобилот удрил во задниот лев дел од приколката.
Во патничкото возило имало петмина македонски државјани. Тројца починале на местото, а двајцата повредени биле пренесени на медицински третман.
Од МНР велат дека случајот го обработуваат надлежните полициски органи во Копер.
„Амбасадата на Република Северна Македонија во Љубљана е во комуникација со надлежните словенечки институции и го следи понатамошниот тек на постапката“, соопшти Министерството.
Причините и целосните околности за тешката несреќа ги утврдуваат словенечките надлежни органи.
