(Видео) Реките се излеваат, свлечишта затворија патишта: Словенија и Италија под силно невреме

Обилните дождови предизвикаа поплави, излевање на реки и свлечишта во повеќе делови на Словенија и Италија, каде што спасувачките служби имаат полни раце работа. Во Италија пожарникарите интервенирале повеќе од 340 пати, додека во Словенија се поплавени патишта и објекти.

Најтешка е состојбата во долината на реката Випава во Словенија, каде што се поплавени повеќе локални патишта, а дел од нив се целосно затворени. Во областа Ајдовшчина поплавени се неколку објекти, меѓу кои делови од фабрика за преработка на отпадни води и три куќи. Реката Випава се излева на повеќе места, а од коритото излегла и Колпа во југоисточниот дел на земјата.

— реклама —

Според словенечката Агенција за животна средина, водата би требало да почне да се повлекува во текот на ноќта, кога се очекува и престанок на врнежите. Сепак, обилниот дожд ја зголемил опасноста од свлечишта, особено во западните и југоисточните делови на Словенија.

Невремето предизвикано од атлантската бура „Чарлс“ продолжува да ја погодува и Италија. Најголем број интервенции се регистрирани во Тоскана, каде што пожарникарите постапувале поради поплавени патишта, свлечишта, испумпување вода и оштетена инфраструктура. Во Лигурија се регистрирани повеќе од 80 интервенции, а во Тоскана над 190.

— реклама —

Проблеми има и во Базиликата, каде што силниот ветер предизвикал паѓање дрвја и попречување на сообраќајот, како и во регионот Марке, каде што се излеала реката Метауро. Во Урбанија пожарникарите спасиле жена која останала заробена во својот дом.

— реклама —

Во околината на Џенова, по свлечиште што се случило во текот на ноќта, околу 20 лица останале отсечени од остатокот на населбата. Друго свлечиште во местото Караско предизвикало евакуација на станбена зграда, а дел од жителите ноќта ја поминале во градската библиотека бидејќи немале каде да се сместат.

Во делови од Лигурија биле измерени повеќе од 300 милиметри дожд. Надлежните предупредуваат дека почвата е заситена со вода и дека дури и послаби врнежи можат да предизвикаат нови свлечишта. Дополнително невреме се очекува во понеделник, особено во источниот дел на регионот.

— реклама —

Засега нема пријавени повредени, но службите за цивилна заштита продолжуваат да ја следат состојбата и да им помагаат на загрозените подрачја.