Локалните медиуми од Лесковац наведуваат дека за причините за несреќата на македонскиот автобус кој се истумба засега може да се погодува. Додека едни патници од автобусот тврдат дека возачот возел брзо, други велеле дека тој нагло закочил за да не удри друго возило кое било пред него. Во дел од медиумите се појавија наводи дека возачот заспал, како и дека во моментот на несреќата разговарал на телефон, но официјално до сега причината за несреќата не е соопштена.
Инаку во капелата на Општата болница во Лесковац се телата на трите загинати лица во несреќата. Српските медиуми јавуваат дека обдукцијата завршила во текот на вчерашниот ден. Во страшната несреќа животот го загубија две жени и еден маж, додека 32 лица се повредени.
Во болницата во Лесковац е хоспитализиран и возачот на автобусот. Тој и натаму е на одделението за интензивна нега со повреди на потколеницата и левото рамо.
Во меѓувреме, како што пишуваат српските медиуми, 14 повредени лица вчера биле пуштени од болница. Десет од нив биле преземени од тим лекари со возила на Итна медицинска помош од Македонија, испратени од Министерството за здравство, додека по четири лица дошле нивните семејства. Се очекува во следните седум дена и останатите повредени да бидат пуштени на домашно лекување.
