Еден тон забранети пилешки желудници запленети и уништени во месарници во Охрид и Струга

Еден тон пилешки желудници, чиј увоз и употреба се забранети, како и 55 килограми месни подготовки во кои биле употребени, се запленети и уништени при вонредни инспекциски контроли во месарници во Охрид и Струга.

— реклама —

Од Агенцијата за храна и ветеринарство (АХВ) информираат дека против две месарници што не ја почитувале забраната за увоз и употреба на пилешки желудници за човечка исхрана, како и за нивна употреба во производството на месни подготовки и производи, се преземени соодветни прекршочни мерки.

— реклама —

Контролите се дел од засилените активности на АХВ насочени кон спречување на незаконските активности во прометот со овој вид храна, сузбивање на криминалот и заштита на здравјето на потрошувачите.

Забраната за увоз и употреба на пилешки желудници наменети за човечка исхрана АХВ ја донесе во јули 2024 година, поради потенцијалните ризици по здравјето на луѓето. Меѓу нив се можноста за контаминација со патогени бактерии и вируси, како и присуството на токсини.

— реклама —

Од Агенцијата посочуваат дека одлуката била донесена врз основа на спроведена анализа на ризиците од консумирање на овој вид внатрешни органи од живина, како и на резултатите од инспекциските контроли.

— реклама —

При претходните контроли биле утврдени злоупотреби и измама на потрошувачите од страна на неколку месни индустрии, поради што била воведена забраната.