Долготрајното седење не предизвикува само болки во грбот и вратот, туку може да доведе и до состојба позната како „синдром на мртов задник“, предупредуваат експертите, пренесува „Хафпост“.
Станува збор за состојба наречена глутеална амнезија, при која мускулите на задникот ослабуваат и престануваат правилно да се активираат.
Физиотерапевтката Арлен Реј објаснува дека проблемот најчесто се јавува кај луѓе кои поминуваат многу време седејќи.
„Мускулите на задникот не се активираат, додека мускулите на колковите и задната ложа стануваат затегнати“, вели таа.
Според докторката Џенифер О’Конел, долгото седење со текот на времето може да доведе и до оштетување на тетивите.
Најчести симптоми се болка, вкочанетост и чувство на трнење во пределот на задникот, а болката може да се прошири и кон нозете.
Експертите предупредуваат дека состојбата може да предизвика и болки во грбот, колковите, колената и зглобовите, бидејќи мускулите на задникот имаат важна улога во стабилноста и држењето на телото.
Како превенција се препорачува редовно движење, станување на секои 30 минути и вежби за зајакнување на мускулите на задникот, како што се чучњеви, исчекори и истегнувања.
Стручњаците советуваат лекарска помош доколку болката трае подолго или значително го нарушува секојдневното функционирање.
