Неколку експлозии одекнале утрово во близина на иранскиот остров Харг во Персискиот Залив, еден од клучните центри за извоз на иранска нафта. Засега нема официјална потврда за причината за експлозиите, но ирански медиуми известуваат дека во близина на островот бил погоден нафтен танкер и ги обвинуваат САД за нападот.
Според агенцијата Фарс, потеклото на експлозиите засега не е познато. Иранската Студентска новинска мрежа, пак, објавила дека танкерот бил цел на напад и дека зад него стоеле американските сили. Засега нема информации за жртви.
Островот Харг има огромно стратешко значење за Иран бидејќи таму се наоѓа главниот терминал за извоз на нафта во земјата. Токму поради неговата важност, островот во изминатиот период беше во центарот на заканите и предупредувањата поврзани со конфликтот меѓу САД и Иран.
Американскиот претседател Доналд Трамп на 31 август објави снимка генерирана со вештачка интелигенција на која се прикажува напад врз Харг, проследена со порака дека островот е „разнесен на парчиња“. Сепак, американски претставник тогаш појасни дека не станувало збор за објава на веќе извршен напад врз островот.
Американскиот потпретседател Џеј-Ди Венс изјави дека објавата на Трамп била порака до Иран, а не најава за воена операција против Харг. Во меѓувреме, САД веќе извршија потврдени напади врз цели на иранскиот остров Ларак во Ормускиот Теснец.
Засега нема независна потврда дека американските сили стојат зад најновите експлозии кај Харг, ниту се познати сите детали за наводниот напад врз танкерот.
